Районда волонтерлар өлкән яшьтәге райондашларга булыша
Район халыкны социаль яклау идарәсе белгече Светлана Салаватуллина белдерүенчә, кайнар линия телефоны аша кергән мөрәҗәгать тәүлек дәвамында үтәлә. Волонтерлар кирәк-яракларны сатып алалар һәм хуҗасына илтеп тапшыралар. Барысы да гадел башкарыла. Продуктлар тикшереп алына, исәп-хисап ясалына. Шулай ук куркынычсызлык кагыйдәләре дә төгәл үтәлә. Волонтерлар махсус битлекләрдән, перчаткалардан йөриләр. Алар өйгә үтеп кермиләр. Чөнки ул тыелган.
Бүгенге көндә волонтерлар отряды 3 өлкән райондашыбызга ярдәм күрсәткән. Апаста яшәүче тыл хезмәтчәне Әминә апа Саматова да кайнар линия телефонына мөрәҗәгать итеп, кирәк-яраклар белән тәэмин ителгән.
Районда коронавирус пандемиясенә бәйле рәвештә (884376)21-0-80 “Кайнар линия” телефоны ачылды. Ул “Рассвет” халыкка социаль ярдәм күрсәтү комплекслы үзәге базасында азык-төлек һәм дарулар китерү мәсьәләлре буенча ялгыз яшәүче өлкән яшьтәге гражданнарга һәм инвалидларга шалтыратулар өчен билгеләнгән.