КҮҢЕЛЛӘРНЕ САФЛАНДЫРЫП КАЙТТЫК
Мөселман дөньясы рабигаль әүвәле аенда пәйгамбәребез Мөхәммәт Мостафа с.г.с.нең туган һәм ахирәткә күчкән көннәрен билгеләп үтте. Халык телендә мәүлид ае дип аталган бу айны ел саен районыбыз мөселманнары да бәйрәм итә. Әби-бабайларыбызның бәләкәй ызбаларда, оя тулы балалар белән дә шушы бәйрәмдә күрше-күләнне чакырып мәүлид ашы үткәрүләре безнең хәтерләрдә саклана әле. Халкыбыз элек-электән үк шулай юмарт, өлгер, сәләтле булган бит ул.
12 февральдә район мәдәният йортында үткәрелгән мәүлид бәйрәме дә шуның бер мисалы булды. Каратунның “Сәфәр” һәм “Нәҗип” мәчете әһелләре, аерым алганда Азат хаҗи, Гыйльфан хәзрәт, Сания, Фатыйма абыстайлар һәм, гомумән, Каратунлылар оештырган бу чара Апаслылар күңелендә озак сакланыр, мөгаен. Хәзрәтләрнең, шул исәптән Апас имамнарының да тирән мәгънәле вәгазьләре, абыстайларның чишмәдәй челтерәп торган тавышлары белән мөнәҗәт әйтүләре кемнең генә йөрәген кузгалтмый калдырды икән? Залда утырган һәркем, бигрәк тә мәктәп балалары, лицей укучылары пәйгәмбәребез турындагы мәгълүматларны гаҗәпләнеп тә, тетрәнеп тә тыңлады. Балалар бакчасында тәрбияләнүче бәләкәчләрнең, мәчеттә укучы шәкертләрнең чыгышлары да бәйрәмне бизәде. Ул гына да түгел, пәйгамбәребез Мөхәммәт с.г.с. турында күпләребез белмәгән яңалыкларны да бәян итте алар. Кыскасы, бәйрәмне оештыручы, һәм анда катнашучы һәркемгә халык рәхмәтле булып калды. Дини сукмактан без барыбыз да тагын бер адым алга атладык.