Фәһимә әби Сәмигуллина: «бирешергә уйламыйм әле»

Түбән Биябаш авылыннан 90 яшьлек Фәһимә әби Сәмигуллина озын гомерле булу серен хезмәттә һәм сабырлыкта күрә.

Тормыш иптәше Кафил абый белән биш бала тәрбияләп үстергәннәр. Кызганычка каршы, бала югалту кайгысы да аларны читләтеп узмады. Уллары Ринат авариядә үлгән. Хәзерге вакытта Фәһимә әби ялгыз яши. Шуңа да карамастан, ул үзен ялгыз хис итми. Атнага берничә тапкыр кызы Наилә янына килә, хуҗалык эшләрендә булыша, ашарга әзерли.
- Әни безне балачактан хезмәткә өйрәтте. Ул эшләгән кеше генә бәхеткә ирешә, дип кабатларга ярата иде. Гомер буе терлек асрыйлар. Урманга җиләк-җимеш алып йөрдем, чикләвек җыйдым. Хәзер дә ул утырырга, кул кушырып утырырга яратмый. Көченнән килгәнчә хәрәкәт итәргә тырыша. Бергәләп помидор, кыяр, кишер, суган утыртабыз. Ул безне капка янында каршы ала, догалар белән озатып йөри, – ди кызы.
Фәһимә Сәмигуллина үзенең юбилеен мул табын артында, балалар һәм оныклар янәшәсендә каршы алды. Аны котларга район үзәгеннән дә килгәннәр иде. Район башкарма комитеты җитәкчесе Алмаз Тугушев акъәбига дәүләт башлыгы, район башлыгы котлауларын җиткерде. Авыл халкы исеменнән авыл җирлеге башлыгы Физзат Миңнуллин котлау һәм бүләк тапшырды.