Зур хезмәт тәҗрибәсе булган механизатор Илдус Сәлимгәрәевны Югары Ындырчы авылы янындагы кырда очраттык.
Үзенең "Нью Холланд"ында ул шикәр чөгендере чәчүдә катнаша. Илдус абый үзенә яшь алмаш әзерли – аның белән бергә улы да эшли. Аграр көллияттә белем алучы Алмаз әтисеннән калышмый.
- Улым белән эшлибез. Көндез эшлим икән, кичкә Алмаз алыштыра. Бергә эшләү күңелле. 30 елдан артык кыр эшләрендә катнашам. Техникага, җиргә, хезмәткә мәхәббәт минем канымда салынган, - ди Илдус Сәлимгәрәев.