Район кырларында хезмәт дәресе

Апас аграр көллияте төп чәчү эшләрен 3 майда төгәлләде. Бүгенге көндә укучылар укытучылар-мастерлар белән бергә 5 гектардагы яңгырлар аркасында калган мәйданда эш башкаралар.

Аграр көллиятнең чәчүлек мәйданнары барлыгы 200 гектар тәшкил итә. Бүгенге көндә биредә 30 гектар арыш, 60 гектар көзге бодай, 70 гектар арпа, 40 гектар сабан бодае чәчелгән. Һава торышының үзгәрүчәнлеген аңлап, коллектив эшләрнең төп өлешен май башында ук тәмамлады. Бүгенге көндә укучылар, үз осталары белән бергә, яңгырдан соң кипкән юл кырыенда, шулай ук агрегатлар өчен җитәрлек булмаган урыннарда чәчү эшләрен башкаралар.
- Дәресләрдә алган белемнәрне без кырда, хезмәт күнекмәләре аша ныгытабыз. Сөрүлек, чәчәбез, тырмаланабыз, язгы эшләрне басуларда төгәллибез. Өлкән остазлар белән эшләү бик ошый, - ди Свияжск бистәсеннән 2 курс студенты Данил Машин.
Мастер-укытучы Иршат Гыйләҗев та үз студентлары белән эшли. Аларга җентекле киңәшләр бирә, эшләрнең төгәл үтәлешен күзәтеп тора, кирәк булганда урында төзәтмәләр кертә һәм аңлата.
- Дәресләрдә без үзебезнең студентларны авыл хуҗалыгы эшләренең барлык нечкәлекләренә өйрәтәбез. Алга таба укучылар механизаторлар, техник-механиклар, хуҗалыклар агрономнары булып эшли алачаклар. Алар шулай ук үз фермер хуҗалыкларын да булдыра алалар, - ди ул.
Аграр көллиятнең Мастер-укытучысы Илшат Минһаҗев һәм аның ярдәмчесе Ленар Тимергалиев "Нью-Холланд" тракторында 9 метрлы "Амазон" чәчкечләре белән юл читендә эшләрне төгәлләп киләләр.
– Быел яңгырлар бераз комачаулады. Шулай да без бергәләп чәчү эшләрен башкарып чыктык. Эш туктамасын өчен, төнге икегә кадәр басуларда булырга туры килде. Хәзер калган 5 гектарда эшләрне төгәллибез, - ди осталар.
Аграр көллият укучылары язгы кыр эшләренә бик теләп кушылдылар. "Апас-мол", "Табар", "Ибраһимов һәм К", "АгроАктив"хуҗалыклары басуларында техник-механиклар төркеменең 35 студенты хезмәт чыныгуын уза.