“IT-чемпион” бәйгесендә өч апаслы җиңде

28 декабрьдә Казанда урнашкан “IT-парк” үзенә 154 баланы җыйды. Алар – республика районнарыннан “IT-чемпион” конкурсында катнашып призлы урыннарга лаек булучылар. Шулар арасында Апас урта мәктәбенең 9 “А” сыйныфы укучылары Гүзәл Зәйнуллина, Эльмира Гыйззәтова һәм Руслан Салаваатуллин булды. Гүзәл Зәйнуллина республикакүләм “IT-чемпион” конкурсының III турында катнашып, өченче урынга лаек булды, Эльмира Гыйззәтова – беренче урын, Руслан Салаватуллин – икенче урын алдылар. Шулай ук Эльмира Гыйззәтова 4200 балл җыеп, иң югары баллар җыючылар санына керде.
Бу бәйгедә җиңү өчен бу укучылар әти-әниләр белән https//uslugi.tatar.ru сайтында газ, ут, телефон һәм башка түләүләрне түләделәр.
“IT-парк”та балалар өчен кызыклы экскурсия һәм күңел ачу программасы оештырылган иде. Кыйммәтле бүләкләрне, Дипломнарны республиканың премьер-министры Илдар Халиков, Фән һәм мәгариф министры Энгель Фәттахов тапшырдылар.