Бөек Ватан сугышында Җиңүнең 70 еллыгына бәйрәм итүгә әзерлек

Исегезгә төшерәбез, “Бөек Ватан сугышында Җиңүнең 70 еллыгын бәйрәм итү турында” Татарстан Республикасы Президентының Указына 2012 елның 9 октябрендә имза салынган иде. Документ кысаларында республикада 1941-1945 еллар Бөек Ватан сугышында Җиңүнең 70 еллыгына бәйрәм итүгә әзерлек һәм аны уздыру буенча республика оештыру комитеты төзелгән иде һәм, уздыру сроклары күрсәтелеп, чаралар планы расланган иде, Татарстан Республикасы муниципаль районнары һәм шәһәр округлары башлыкларына шулай ук оештыру комитетлары төзергә һәм муниципаль берәмлекләрнең үз чаралар планнарын расларга кушылды.
Рөстәм Миңнеханов оештыру комитеты утырышында билгеләп үткәнчә, Бөек Ватан сугышында Җиңүнең 70 еллыгына бәйрәм итүгә әзерлек һәм аны уздыру эше системалы рәвештә уздырыла. Аның сүзләренчә, мәктәпләрдә, техникумнарда, югары уку йортларында зур эш башкарылырга тиеш. Күпләр бүген Бөек Ватан сугышы геройлары исемнәрен белмиләр, диде ул, бу дөрес түгел, без үз тарихыбызны белмәсәк, ветераннар киләчәк буыннар өчен башкарган каһарманлыклар белән горурлана да алмаячакбыз. “Бөек Ватан сугышы геройлары туган-тумачаларының һәлак булганның истәлегенә багышланган тантаналар уздырыла торган урынга бару өчен билет сатып алырлык мөмкинлеге булмау очраклары булмаска тиеш, диде Рөстәм Миңнеханов, - Бу – оят нәрсә. Бүген безнең яшь буынны тәрбияләрлек мондый моментларыбыз аз калды. Ветераннар мәктәп балалары белән очрашсыннар, сугыш турында, күргәннәре турында сөйләсеннәр иде”. Татарстан Республикасы Президенты сүзләренчә, бөек Җиңүне бәйрәм итүгә әзерлек эшенә барлык халыкны – яшьләрне дә, бизнес вәкилләрен дә, волонтерлар һәм иҗтимагый оешмаларны да җәлеп итәргә кирәк.
Районнарда ветераннар оешмалары, ветераннар советлары белән эшне оештыру бик мөһим, дип саный Рөстәм Миңнеханов, бу уздырылган чараларның нәтиҗәлелеген арттырырга һәм формализмнан котылырга ярдәм итәчәк.
Татарстан Республикасында 96707 Бөек Ватан сугышы ветераны яши, шулар арасында – 6208е Бөек Ватан сугышында катнашучы һәм инвалид.

Татарстан Республикасы президенты булышчысы Ләйлә Фазлеева хәбәр итүенчә, Казанда Бөек Җиңүгә багышланган хәрби техника  парады 9 май көнне булмаячак. 9 май көнне сәгать көндезге  10.00 да Казан хәрби гарнизонының тантаналы парады булса, кичке 10.00 салют булачак. Бәйрәмгә кагылышлы чаралар инде 23 апрельдән үк башланачак – “Георгий тасмасы” акциясенә старт нәкъ шул көнне биреләчәк, ә 7 май көнне башкаланың Муса Җәлил исемендәге Опера һәм Балет театрында республикакүләм Җиңү көнен билгеләп үтәчәкләр.