Апас муниципаль районы

Хөрмәтле райондашлар!

2015 елның 30 апреле, пәнҗешәмбе

Кадерле дуслар! Хөрмәтле райондашлар, сугыш һәм хезмәт ветераннары!
Сезне ихлас күңелдән иң матур бәйрәмнәребезнең берсе— Яз һәм Хезмәт бәйрәме белән котлыйм!
Өлкән буын өчен 1 Май, хезмәт ияләренең берләшү символы буларак, азатлык, гаделлек, бердәмлек кебек мөһим кешелек кыйммәтләрен чагылдырса, яшьләр өчен ул яңа идеяләр, беренче чәчәкләр һәм күтәренке кәеф чоры. Бу якты, күркәм бәйрәмнең безне якынайта һәм берләштерә торган башлангычы бар. Ул–илебез, республикабыз һәм районыбыз иминлеге хакына яңа уңышларга омтылу, намуслы тырыш хезмәт итү.
Игенче һәм терлекче, укытучы һәм табиб, сәнгать эшлеклесе һәм районыбыз икътисадының башка тармак хезмәткәрләре, укучы һәм ихтирамлы ветераннарыбыз–һәркайсы уртак эшләребезгә, җәмгыятебезнең социаль-икътисадый үсешенә лаеклы өлешен кертә. Хезмәтчәннәребезнең күпчелеге 1 Май бәйрәмен басуларда киләчәк уңыш өчен удар көрәш вахтасында каршылый. Игенчеләребезнең бүгенге тырышлыгы, кыр эшләренең торышы быел аграр секторда алга таба тагын зур адым ясалачагына, амбарларыбызның тулы, үстереләчәк ашлыкның сыйфатлы булачагына ышандыра.

Киләчәктә дә халкыбызның хезмәт сөючәнлеге, аның бердәмлеге, күңел күтәренкелеге һәм игелекле гореф-гадәтләренә тугрылыгы билгеләнгән максатларга ирешергә, туган җиребезнең һәм җәмгыятебезнең иминлеген тәэмин итәргә мөмкинлек бирер, дип ышанам.
Хөрмәтле райондлашлар!
1 Май бәйрәмендә йортларыбыз өстендәге тыныч күк йөзендә язгы кояш балкысын, сәләтле һәм хезмәт сөючән күпмилләтле халкыбыз матур яшәсен, сугыш һәм хезмәт ветераннарыбыз безнең ихтирамыбызның һәм хөрмәтебезнең җылысын тойсын.
Бәйрәм көннәрендә сезгә ныклы сәламәтлек, күтәренке кәеф, барлык изге эшләрегездә уңышлар телим! Гаиләләрегезгә иминлек һәм бәхет юлдаш булсын!
Бәйрәм белән, кадерле райондашлар!

Ихтирам белән, Апас муниципаль район башлыгы Рәшид Заһидуллин.

БАРЛЫК ЯҢАЛЫКЛАРНЫ УКУ