Гөрләде Апаста Сабан туе
Быелгы Сабантуй бәрәмененең яңалыгы буларак, Татарстан Республикасының “Президент белән бергә” җәмәгать хәрәкәте тарафыннан биредә ГТО нормаларын тапшыру оештырылды. Теләге булган һәр кеше үзен гер күтәрүдә, озынлыкка сикерүдә, гәүдәне төз тотуда сынап та карады.
Бераз суытып торса да, тәмле кайнар ризыклар, шашлык исеннән, җыр-моңнардан, балаларның шат тавышларыннан һава җылытып та җибәргән төсле тоелды. Балалар рәхәтләнеп батутта сикерделәр, төрле уеннарда уйнадылар. Район үзешчәннәренең чыгышларын халык тын алмыйча да карады. Күктә йөзгән күксел болытлар да, ара-тирә яуган яңгыр да көрәш мәйданындагы халыкны куркытмады. Көрәш яратучы райондашларыбыз баш батыр исемен ишеткәч кенә кузгалдылар. Ә баш батыр булып Апас егете Рафис Хабибуллин калды.