Апас муниципаль районы

Республика көне уңаеннан Апаста зур бәйрәм булды

2015 елның 2 сентябре, чәршәмбе

Республика көне уңаеннан районда зур бәйрәм булды. Чөнки бу бәйрәм үз эченә күп төрле истәлекле даталарны алган иде. ТАССР төзелүгә – 95 ел, Татарстан Республикасына – 25 ел, ә инде туган төбәгебез Апас районы оешуга 85 ел булды. Бәйрәм тантанасында район башлыгы Рәшид Заһидуллин, якташыбыз “АК Барс” банк идарәсе рәисе Роберт Миңгалиев катнашты.

Район мәдәният йорты каршында иртәдән үк җыр-моң агылды. Мәдәният хезмәткәрләре мәйдан тутырып халыкны сәламләде, җыр-моңнары белән ял иттерде.

Район башлыгы һәм килгән кунаклар ярминкә барышы белән танышып, халык белән аралашып чыкканнан соң, бәйрәмнең тантаналы өлеше башланып китте.

Президент программалары ярдәмендә Апаста бик күп эшләр эшләнде. Алар барыбызның да күз алдында. Апасыбыз тагын да матур булырга тиеш. Бердәмлек һәм тырышлык нигезендә без моңа ирешәчәкбез, – диде район башлыгы.

Мәйдан бер генә дә бушап тормады. Җырчылар, гармунчылар, биючеләр бер-берсен алмаштырып кына торды. Халык бигрәк тә гармунчыларга соклануын белдерде. Сокланмый мөмкин дә түгел! Бик күп икән бит талантлы райондашларыбыз! Ир-атлар гына түгел, гүзәл хатын-кызларыбыз да өздерделәр үзәкләрне.

– Кечкенәдән гармунда уйныйм. Тормыш иптәшем дә җыр-моңга гашыйк, – диде Иске Йомралыдан Гөлфия апа Ибраһимова.

Алар чыгышын халык алкышларга күмде. Бәйрәмне алып баручы Гөлия Сәлахетдинова да бу юлы тормыш иптәше Альбертны үзе гармунда уйнап җырлатты.

Бу көнне җыр-моңнар шактый озак дәвам итте. Халык рәхәтләнеп ял итеп, мәдәният хезмәткәрләренә рәхмәтле булып, күтәренке рухта өйләренә таралды.

БАРЛЫК ЯҢАЛЫКЛАРНЫ УКУ