Апаста бетон һәм асфальт заводлары ачылачак

Районда эш урыннары арта. Хәзерге вакытта Заготзерно бистәсендә, элеккеге райтоп базасы урынынында бетон һәм асфальт заводларын төзү эше бара. 
- Элек бу урын ташландык хәлдә иде. Бүген күзгә күренерлек эшләр бар. Бетон заводы инде урнаштырылды. Шулай ук асфальт заводын ясау эше дәвам итә. Урыны тигезләнде, тиздән тирә-юне тирәләп тә алыначак. Ул Идел аръягы районнарын асфальт белән тәэмин итәчәк. Эшләр “Волгадорстрой” оешмасы тарафыннан башкарыла, - ди район башкарма комитеты җитәкчесенең инфраструктур үсеш буенча урынбасары Айрат Хәсәнов. 
Төзелеш мәйданында җанлылык сизелә. Һәркем үзенә билгеләнгән вазифаны төгәл башкарырга тырыша. 
-Яңа җитештерү базасы ачыла. Бетон заводын эшкә җибәрдек. Гаражлар төзибез, юлларны ясыйбыз. Яңа технологияләр белән эшлибез, - диде төзелеш оешмасының мастеры Дмитрий Машин.