ЯҢАЛЫКЛАР

Ындырчы авылында яшәүче Вил Хантимеров һәм шушы авыл җирлеге башлыгы Фирдүс Гафиятуллин быелгы Сабан туена үзгә бер ямь бирүче тарантаслар ясадылар. Аларга район башлыгы Рәхмәт хаты тапшырды.

Әфганстан Республикасындагы хәрби хәрәкәтләрдә катнашкан 10 ир-егеткә Татарстан Республикасы Министрлар Кабинеты Координацион Советының Рәхмәт хатлары тапшырылды.

Концерт мәйданыннан ерак түгел генә яше-карты күңелләре булганчы биеде, күңел ачты. Иң матур, иң җитез, иң озак биючеләргә Сабан туе бүләкләре тапшырылды. Шулай ук лотерея билетлары уйнатылды. Туган авылым мәдәни-этнографик комплексыннан да кеше өзелеп тормады.

Тиздән армия сафларына китәчәк егетләр дә игътибардан читтә калмады. Аларга хәерле, ак юллар, исән-сау хезмәт итүләрен теләп егетләргә кул сәгатьләре бүләк ителде.

Апас авылыннан әле шушы көннәрдә генә 90 яшьлек олы юбилеен билгеләп узган сугыш һәм хезмәт ветераны Хатыйп Салаватуллин да мәйданга чакырылып хөрмәтләнде.

Район Сабан туенда һәр ел саен яңа гына тәпи атлап киткән нәниләр дә мәйдан түрендә булалар. Бу бәйрәм Иске Әнәле авылыннан игезәкләр Азамат һәм Азиза Сәлимуллиннар һәм аларның әти-әниләре өчен аеруча истәлекле булды. Нәниләргә зур уенчыклар тапшырылды.

Сатмыш авылыннан яңа гына Кызыл туйларын билгеләп үткән яшь парлар Илмас һәм Алинә Гайфетдиновлар чакырылгач, мәйдан тагын да җанланып китте. Аларга район башлыгының Рәхмәт хаты һәм автомат кер юу машинасы тапшырылды.

Олы Бакырчы авыл җирлеге авыл хуҗалыгы хезмәтчәннәрен, дусларны, туганнарны җыеп кичке Сабантуй үткәрде.

7 июньдә район халкы көтеп алган милли бәйрәмебез Сабан туен бәйрәм итте. Елдан-ел күркәмрәк, күңеллерәк була безнең Сабантуйлар. Быел да халыкка – олысына-кечесенә, кайткан кунакларга ял итәр, күңел ачар өчен бөтен шартлар да бар иде. Сабан туйга керү юлыннан ук кунакларны милли киемнәрдән киенгән егет-кызлар ипи-тоз, чәкчәк белән каршы алып, һәркемне биетеп-җырлатып, изге теләкләре белән мәйданга озаттылар. Теләгән кеше өчен затлы тарантаслы бизәлгән атлар да әзер иде.