Район эчке эшләр бүлеге хезмәткәрләре Алабуга шәһәрендә республикакүләм самбо буенча ярышларда катнаштылар. Илфат Шиһабиев, Ринат Паймурзин, Алмаз Габдрахманов, Руслан Ваһапов, Илшат Мухамов составындагы команда биредә өченче урынны яулады һәм кубокка, Мактау грамотасына, бүләкләргә лаек булды. Алмаз Габдрахманов һәм Илшат Мухамов исә шәхси беренчелектә дә өченче урынны яулап, медальләргә ия булды. 

Дәүләки мәктәбе укытучылары Гөлнара Баева белән Фәния Хәйбуллина Каратун, Колчык, Биеш, Дәүләки, инде югалган Красный Пахарь авыллары тарихы, аның кешеләре турында бик җыйнак, зәвыклы видеофильм эшләгәннәр. «Апас хәбәрләре» җирле телекомпаниясе журналистлары үрнәгендә ул ел саен яңартылып тора. #добрыйтатарстан

Язгы кыр эшләре башлану, җәй айлары җитү сәбәпле  район башлыгының халыкны кабул итү вакытлары үзгәрде. Өлек район башлыгы һәр сишәмбе, җомга сәгать 10.00-12.00 вакыт аралыгында кабул итүләр үткәрсә, яңы вакыты һәр сишәмбе, җомга иртәнге 7.00 дан 9.00 га кадәр дәвам итәчәк.

Бөек Җиңүнең 70 еллыгы уңаеннан Каратун мәдәният йортында “Онытырга хакыбыз юк“ дип исемләнгән кичә узды. Шушы төбәкнең дин әһелләре, балалар бакчалары нәниләре, мәктәп укучылары, өлкәннәр, гомумән, җырга-моңга һәвәс олысы-кечесе катнашты биредә. Сугыш елларын чагылдырган җырлар, шигырьләр яңгырады.

Казанда узган Йолдызлык” (“Созвездие”) – 2015 ачык республика телевизион яшьләр эстрадасы сәнгате юбилей фестиваленең сайлап алу турларында безнең районыбызның яшь талантлары да катнашты. Каратун мәктәбе укучысы Алия Нәфыйкова “конферанс” номинациясендә барлык турларда да уңышлы чыгыш ясап, 17 апрель көнне “Уникс”та йомгаклау концертында чыгыш ясады. Аңа махсус бүләк тә тапшырылды. Алиянең бу көннәрдә күңеле шатлык белән тулы. Ул дусларына, классташларына кичерешләре, тәэсирләре хакында сөйли һәм барыннан да бигрәк җитәкчесе Сәвия Тимершинага олы рәхмәтен җиткерә. Без дә Алияне зур уңышы белән тәбрик итәбез!