ЯҢАЛЫКЛАР
19 гыйнварда христианнар Крещение бәйрәмен билгеләп үтә. Керәшеннәр аны Качману бәйрәме дип атый. Крещение алды кичендә һәм бәйрәм көнне чиркәүләрдә гыйбадәт кылу һәм суны изгеләндерү йоласы башкарыла.
Крещение суы сихәтләндерү көченә ия, хәтта бу көнне гадәти чишмәләрдән дә изге су ага, дип ышаналар. Шулай ук бу көнне буа, елга, күлләрдә бәке ясап, су коену йоласы да үткәрелә.
Узган ел Крещениегә Татарстанның иллеләп шәһәр һәм авылларында 66 су коену урыны булдырылган иде. Сулыклардагы боз катламы тиешле калынлыкка җитмәү сәбәпле, республиканың Гадәттән тыш хәлләр министрлыгы кайбер елгаларда бәке ясарга рөхсәт итмәде. Быел сулыкларны каплаган боз күпьеллык уртача күрсәткечләрдән һәм узган елдагыдан да калынрак, нәтиҗәдә, кешеләргә коену өчен 74 иордан бәкесе әзерләнер дип көтелә. Суга чуму урыннарында полиция, фельдшер, гадәттән тыш хәлләрне кисәтү хезмәткәрләре кизү торачак.
Иордан суында коену чиркәү кануннары таләп иткән мәҗбүри гамәл түгел, ул – гореф-гадәт. Изгеләндерелгән су белән юыну да җитә, бәкегә тәвәккәлләр генә керә. Иорданда су коену – күңелдән дога кылып, өч тапкыр суга чумып алудан гыйбарәт. Крещение бәкесендә православие динен тотмаганнарга да коенырга рөхсәт ителә. Әлбәттә, салкын суга керү өчен тәвәккәллек кенә түгел, сәламәтлекнең нык булуы да кирәк.
Район башлыгы Рәшид Заһидуллин ОАО “Жилкомсервис” директоры Мөхәммәтшин Айдар Шәйхелислам улына намуслы хезмәте, районның инфраструктур үсешенә лаеклы өлеш керткәне, һәм 40 яшь тулу уңаеннан Рәхмәт хаты тапшырды.
Бүген ул югары нәтиҗәле хезмәте белән Апас муниципаль районының үсешенә зур өлеш керткәне һәм 30 яшь тулу уңаеннан Татарстан Республикасы Апас муниципаль район Советы Мактау Грамотасы белән бүләкләнде. Бу олы бүләген аңа район башлыгы Рәшид Заһидуллин тапшырды.
Бүген район башлыгы Рәшид Заһидуллин әле яңа гына билгеләнгән Бакырчы мәктәбе директоры Сәгъдиева Лилия Аромат кызына белем бирү өлкәсендә намуслы хезмәте һәм үсеп килүче яшь буынны тәрбияләүдә лаеклы өлеш керткәне өчен Рәхмәт хатын тапшырып, алга таба да эшендә зур уңышлар теләде.
Иске Әнәледә иске клуб урынына яңасы төзеләчәк. Бу хакта район башлыгы Рәшид Заһидуллин төзелеш урынына барып хәбәр итте. Клуб 100 урынга исәпләнәчәк һәм китапханәне дә үз эченә алачак. Биредә үк балалар бакчасы да урын алыр дигән өмет бар. Бүген Иске Әнәледә 460 кеше яши. Халык клуб тутырып бәйрәм-тамашаларга йөри. Җырга, биюгә дә һәвәс алар, сәнгатьнең эчендә кайнап яшиләр. Әлеге яңалык өчен дә чын күңелдән сөенделәр, киләчәккә булган планнары белән уртаклаштылар.
“Татарстан почтасы”, “Татмедиа” тарафыннан игълан ителгән “Иң яхшы хат ташучы” һәм “Иң яхшы почта бүлекчәсе” республика бәйгесенең район турына нәтиҗәләр ясалды. 2015 елның беренче яртыеллыгына “Йолдыз” (“Звезда”) газеталарына иң күп яздыртучы өч хат ташучы һәм бер почта бүлекчәсе баш мөхәррир Гүзәл Хилавиева кулыннан Мактау грамотасы белән бүләкләр алдылар.
12 гыйнвар кичендә боз сараена искечә Яңа елны каршылау уңаеннан бик күп райондашлар җыелды. Биредә кулларына тимераяк тоткан балаларны гына түгел, аларның әтиләрен-әниләрен, дәү әти-дәү әниләрен, апа-абыйларын да очратып була иде. Гаиләләре белән килүчеләр күңелдә аеруча соклану уятты. Район үзәгендә яшәүчеләр генә түгел, хәтта ерак авыллардан килүчеләр дә бу манзара-тантананың шаһиты булды. Биредә Кыш бабай, Кар кызы, төрле әкият геройлары балалар белән бергәләп күңел ачтылар, төрле уеннар уйнадылар, массалы шууда катнаштылар. Яшь хоккейчыларның чыгышын һәркем сокланып карады. Шунысы сөендерә, районыбыз балаларының күпчелеге бозда кыю һәм тотрыклы итеп йөри белә. Тимераякка яңа гына басучыларга да өйрәнергә мөмкинлек зур.
Морзалар авылынды гомер кичерүче Рәшидә әби Әхмәдуллина 90 яшьлек олуг юбилеен каршы алды.
– Тормышның ачысын-төчесен күп күрдем, сугыш елларында барлык чордашларым кебек окоп та казыдым, урман да кистем. Авыр хезмәткә адәм баласы чыдый икән. Шөкер, бүгенге матур тормышны да күрергә насыйп булды, – ди Рәшидә әби.
Биш баласы, 11 оныгы, 11 оныкчыгы өчен иң кадерле кеше ул бүген. Рәшидә әбине күркәм бәйрәме белән тәбрикләп район башлыгы Рәсәй Президентының Рәхмәт хатын һәм истәлекле бүләген тапшырды.
Һәр эш көне “Дулкын” бассейнының 11 хезмәткәре 100 гә якын кеше кабул итә. Бассейның иң тирән җире 1,7 метр булса, иң сай җире 1,2 метр. Гомуми зурлыгы 18гә 6 метр. Бассейндагы суны даими рәвештә чистартып һәм җылытып торалар. Шулай ук билгеле вакыт үтү белән суны алыштуры процессы да үткәрелә.
“Мәктәп балалары, өлкәннәр өчен махсус группалар булдырылды һәм йөзү буенча дәресләр бушлай үткәрелә. Йөзергә яратучы калган апаслылар өчен абонементлар сатуда бар. Безгә күп кенә кешеләр табиб кушуы буенча да килә, суда йөзүнең сәламәтлек өчен файдасы күп” – дип сөйләде “Дулкын” бассейны эшчәнлеге турында җитәкчесе Фидаиль Фахрутдинов.