ЯҢАЛЫКЛАР

Район чыгарылыш сыйныф укучылары бердәм дәүләт имтиханы тапшыру мөмкинлеген алу өчен, йомгаклау иншасын язды.

Бакырчы мәктәбенә яңа директор билгеләнде. Ул – әлегә кадәр Морзалар мәктәбендә информатика һәм технология фәннәрен укыткан Румил Гыйлманов. Яңа директорга уңышлар телибез!

– Борнаш урта мәктәбенең 10 сыйныф укучысы Алмаз Гыйниятуллин (җитәкчесе – Нурия Әнвәр кызы) Буа шәһәрендә үткәрелгән “Шәҗәрә – нәсел агачы” дип исемләнгән II төбәкара фәнни-гамәли конференциядә катнашып җиңү яулады һәм I дәрәҗә Диплом белән бүләкләнде, – дип хәбәр итә мәктәп директоры Динә Вилданова.

– 28 ноябрь көнне  Морзалар авылы Умырзая балалар бакчасында әниләргә багышланган бәйрәм кичәсе узды.  Бәйрәм  балалар  чыгышы белән башланып китте. Балалар әниләренә багышлап җырлар  җырладылар, шигырләр сөйләделәр, биеделәр. Әниләрне дә тик кенә  утыртмадык: үзара ярыштырдык. Аннан алдан  бирелгән “Оста куллы әнием” конкурсына йомгак ясадык. Иң-иң уңганнарга грамоталар тапшырдык. Кичә балаларга да, әниләргә дә бик ошады, – дип язганнар бакча тәрбиячеләре.

Апас боз сараена 44 урынлы автобуска өстәп 20 комплект балалар хоккей формаларына  сертификат та бирелде. Шуңа өстәп ике капкачы тулы аммунициясе дә алып кайттык. “Ак Барс” банкы да бу эштән читтә калмады-“Алтын алка” да яңа оешып килүче аерым кызлар командасы өчен 15 комплект хоккей формасы бүләк итте. Район башкарма комитеты карары белән спорт мәктәбе гардеробы тагын 10 комплект балалар хоккей формасына баячак.

Мәгариф бүлегенең 2015-2016 нчы уку елына караган  төбәкара хезмәттәшлек эшчәнлеге, татар теле һәм әдәбияты укытучыларының район метод берләшмә планы нигезендә 25 нче ноябрь көнне  Бакырчы төп мәктәбендә Чувашия Республикасы Яльчик районы Кушкы урта мәктәбеннән бертөркем укытучылар катнашында “Дәвамчанлык шартларында олимпиадага әзерләү үзенчәлекләре” темасына семинар үтте. Программа буенча мәктәпнең татар теле һәм әдәбияты укытучылары Гайнуллина Әлфия Вәли кызы 7 нче сыйныфта татар теленнән, Шәфигуллина Гөлгенә Рифкать кызы 6 нчы сыйныфта әдәбияттан ачык дәрес күрсәттеләр.  

2015 елның 1 декабрендә “Бердәм Россия” партиясенә 14 яшь тула. Шул уңайдан ихлас котлавымны кабул итегез. 14 ел дәвамында партия илдәге иң дәрәҗәле сәяси көчкә әверелде. “Бердәм Россия” – ил, республика, район халкы тормышын модернизацияләүгә, тормыш сыйфатын яхшыртуга нәтиҗәле тәэсир ясый торган партия.

Апасның ЗАГС мәгълүматларына караганда, районда 10 ай эчендә 119 сабый дөньяга аваз салган. Бу чорда кызлар күбрәк туган: 63 кыз һәм 56 малай. Апаслылар Әмирхан, Раян, Самат, Ясминә, Сәйдә, Инзилә һәм Айсылу исемнәренә күбрәк өстенлек биргән. 

Апасның ЗАГС бинасында районыбызның 5 гаиләсе тантаналы шартларда ана капиталы сертификаты алды. Әниләр көне уңаеннан узучы бу чарада Апас һәм Кама Тамагы районнары Пенсия фонды бүлеге җитәкчесе Илмир Гыйльметдинов, районның пенсия фонды бүлекчәсе җитәкчесе Шамил Гаффаров һәм ЗАГС бүлеге хезмәткәрләре катнашты. Кабаттан әни булу бәхетен татыган аналар сертификатлар белән беррәттән яңа гына гаилә юлына аяк баскан парлар тарафыннан әзерләнгән бүләкләргә дә лаек булдылар. 

“Салават күпере” балалар бакчасының иң өлкән төркемгә балалары әниләрен, дәү әниләрен үзләренә кунакка чакырып тәрбияче апалары Зөһрә Билалова, Гөлүсә Гыйбадуллина, Алия Нуриева ярдәме белән шәп кенә бәйрәм бүләк иттеләр. Алар хөрмәтенә матур-матур шигырьләр сөйләп, җырлар башкарып, очып-очып биеп осталыкларын күрсәттеләр. Бәйрәмгә килгән әниләрен дә, дәү әниләрен дә үзләре белән бергә җырлаттылар, биеттеләр, шатландырып хәтта әзрәк кенә еллаттылар да алар. Әле генә теле дә ачылып бетмәгән нәни сабыен балалар бакчасына йөртә башлаган мизгелләр әниләр күңелендә тагын бер кат яңарды. Кайберәүләр балаларының зур егет, кыз булып үсеп җиткәннәренә ышанмый да утырганнардыр, мөгаен. Ахырдан исә әниләр, дәү әниләр бергәләшеп бәйрәм табынына рәхим иттеләр.