Бу уңайдан район башлыгы Рәшид Заһидуллин Рәшидә әбине туган көне белән котлап, Рәсәй Президентының Котлау открыткасын һәм бүләк тапшырды.

Апас авылында яшәүче сугыш һәм хезмәт ветераны Камалетдин Сәләхетдинов үзенең 90 яшьлек юбилеен каршылады. Утны-суны кичкән, бүген якыннары янәшәсендә бәхетле картлык кичерүче ветеран Рәсәй Президентының Котлау хатына һәм район башлыгының истәлекле бүләгенә ихластан рәхмәтен ирештерде.

Республикада һәр 45нче кеше яман шештән интегә, ди Идел буе баш онкологы Рөстәм Хәсәнов. Бүген Бөтендөнья онкологик авыруларга каршы көрәш көне билгеләп үтелә. Бу уңайдан “Татмедиа” Республика матбугат һәм массакүләм коммуникацияләр агентлыгында матбугат конференциясе уздырылды. 2014 ел ахырына Татарстанда яман шеш авырулы 85 мең кеше теркәлгән. Бу, узган ел белән чагыштырганда, 5 меңгә артыграк. Әлеге саннарны ТР Сәламәтлек саклау министрлыгының Республика клиник онкологик диспансеры баш табибы, Идел буе федераль округы баш онкологы Рөстәм Хәсәнов китерде. Аның сүзләренә караганда, яман шеш белән Татарстанда яшәүче һәр 45нче кеше авырый.

Кичәге көчле бураннан соң иртән Апас тынып калган  сыман иде. Апас урамнары юллары чистартылган, көн дә җылынып киткән. Үз йортлары белән яшәүчеләр исә бүген иртәрәк торып, капка төпләрендә сукмак салырга да өлгергәннәрдер, мөгаен. Тик шулай да Апаста бу сәгатьләрдә янәдән кар төшә башлады. Татарстан Гидрометүзәгендә әлегә көчле штормның көн азагына кадәр саклануын хәбәр итәләр. Апаста бүген көчле явым-төшемнәр, бозлы яңгыр, юеш кар булуы көтелә. Җил секундына 24 м тизлектә исә. Юлларда көчле бозлавык, кар көртләре саклана. Сак булыгыз!

2015 елда укучылар БДИне берничә этапта тапшырачаклар. Беренче чиратта, барлык чыгарылыш укучылары (шулай ук башка еллардагы чыгарылышлар) 1 февральгә кадәр гариза язарга тиешләр. БДИны тапшыру этабы март-апрель, төп этап исә май-июнь айларына билгеләнгән. Башка еллардагы чыгарылышлар  өчен рус теле һәм география буенча имтихан 14 февральдә үтәчәк. Алар гаризаны 2014 елның 1 декабренә кадәр язып тапшырырга тиеш иде. Аннан “БДИ-2015” алдан бирү этабы һәм төп этап схемасы буенча барачак. Алдан бирү этабы математика фәне буенча 23 мартта старт алса, 24 апрельдә (резерв көне) тәмамлана. Төп этап география һәм әдәбияттан имтихан белән 25 майда башлана, рус теленнән имтихан 28 майда. Быел математика буенча БДИ ике дәрәҗәле: база (1июнь) һәм профильле (4июнь) булачак. Аның беренчесе укучыларның гомуми үсешен күз алдында тота һәм мәктәпне тәмамлаучыларга аттестат алу өчен кирәк. Математика буенча имтихан нәтиҗәләре исәпкә алына торган юнәлеш буенча укырга керүчеләр профильле дәрәҗәсен сайларга тиеш булачак.

“БДИ-2015” кампаниясе 26 июньдә төгәлләнә.

Район башкарма комитеты җитәкчесе Равил Хисаметдинов җитәкчелегендә махсус комиссия бу көннәрдә авыл җирлекләрендә халык җыеннарында катнаша. Кичә Йомралы, Ишеево һәм Каратун авыл җирлекләрендә үткән бу җыеннарда үзара салым күләмен үзгәртү буенча референдумга әзерлек мәсьәләләре каралды. Ул 15 мартта үтәчәк һәм авылда теркәлеп яшәүчеләрнең 51 проценты аның күләмен хупласа гамәләгә керәчәк. Халык белән сөйләшүләрдә аның күләмен быел 300 сум итеп билгеләү килешенде. Бу Бөек Ватан сугышы ветераннарына, урын өстендә ятучы, хәрәкәтләнә алмаучы инвалидларга һәм 18 яше тулып, көндезге уку бүлекләрендә укучы студентларга кагылмаячак. Халык җыены үткәрер алдыннан махсус комиссия былтыр билгеле категориядәге авылларда яшәүчеләрдән җыелган акчаларның җыелышын һәм кулланылышын тикшерде.

ТРның кайбер торак пунктлары территорияләрендә терлекләр котыру авырулы булганга һәм аларның куркыныч булуы сәбәпле, 28 гыйнварда ТР Президентының карантин кертү турындагы 70нче номерлы Указы чыкты.

"Идел" яшьләр үзәгендә "Кадрлар резервы" республика проектының беренче этабы тәмамланды. Быел проектта Татарстанның 24 районыннан 16дан алып 30 яшькәчә булган 155 егет һәм кыз - эшче яшьләр вәкилләре һәм вуз студентлары катнашты.