ЯҢАЛЫКЛАР

Зөлфия Гайфуллина моннан 28 ел элек Апасның “Кояшкай” балалар бакчасына эшкә килә. Беренче көннән үк балаларны яратып, бар күңелен биреп эшли. Шул вакыт эчендә күпме балага тәрбия, наз, күңел җылысы өләшкән ул. Хәзер дә җиңнәре һәрчак сызганулы аның, бер генә дә эшсез утыруын, боек чагын очратмассың. Әле генә нәниләргә гимнастика ясатса, ул да түгел әйләнә-тирә мохит белән таныштыра, кул эшләренә өйрәтә, әдәп-әхлак кагыйдәләрен тө­шендерә.

Әй, дулкынландылар, бик тырышып хәзерләнгән булсалар да каушаулары да сизелде курсантларның мәртәбәле жюри алдында. Берсенең дә яшьтәшләре алдында да сынатасы килмәде. Чөнки аграр көллиятләр арасында “Һөнәре буенча иң яхшы – 2012” зона бәйгесендә “Иң яхшы машина йөртүче” исемен алу җиңел түгел шул. Аграр көллиятнең булачак шоферларга юл йөрү кагыйдәләре серләрен төшендерүче педогог-оештыручы Рөстәм Мингазиев инициативасы белән беренче тапкыр бездә оештырылды бу бәйге. Биш районнан өч дистәгә якын егет-кыз үзләренең юл йөрү кагыйдәләрен ни дәрәҗәдә белүләрен күрсәттеләр.

Биеш авылы хезмәт ветераннары Блохина Нина Афанасьевна белән Колсанова Людмила Васильевналар “Балкыш” фестивалендә “Расскажу тебе кума” дигән шаян җырлары белән тамашачы мәхәббәтен яуладылар. Алар икесе дә дистә еллар мәктәптә балаларга белем биреп лаеклы ялга чыкканнар. Хәзер дә яшьләрчә җитезлек белән авыл мәдәният йортында уза торган төрле чараларда актив катнашалар. Фестивальдән дә алар Дипломнар, Рәхмәт хатлары, истәлекле бүләкләр алып кайттылар.

Борнаш авылында зур тантана үтте. Биредә 154 балага исәпләнгән, заманча, барлык уңайлылыклары булган мәктәп ачылды.

Картлар йорты. Монда яшәүчеләр төшләренә кереп йөдәткән туган якларыннан килгән һәр хәбәрне, яңалыкны сабыйларча сөенеп, канатланып кабул итәләр. Сагыну сагышыннан бәгырьләре телгәләнгән апа-абыйларның күңелләре чайкалып түгелергә генә тора. Буа, Тәтеш, Югары Ослан, Кайбыч районнарындагы картлар йортларында 17 райондашыбыз тәрбияләнә.

Туган җир, туган туфрак, туган нигез дигән төшенчәләрнең кадере яшәгән саен арта бара. Кендек каны тамган җир авылдашларны, якташларны җыя, берләштерә. Данлы райондашлар үзләренең изге эш-гамәлләре белән сөендерүләрен дәвам итәләр. Сатмышта да Сара һәм Роза Каратайлар тырышлыгы белән гап-гади бер көн чын бәйрәм төсен алды. Тантанада районара янгынга каршы көрәш бүлеге җитәкчесе Леонид Ромачков, "Бердәм Россия" партиясенең Апас җирле бүлеге җитәкчесе Румия Идрисова, авыл җирлеге башлыгы Заһид Шәрәфиев, дин әһелләре, укучылар һәм авыл халкы катнашты.