Апаслылар бәйрәм көннәрендә музейлардагы экспозицияләр белән танышырга мөмкиннәр. Апас «Туган төбәкне өйрәнү», Тутайдагы Сара Садыйкова, Шәмбалыкчыда Фәхри Насретдинов һәм Бану Вәлиева, Олы Бакырчыда Шәүкәт Галиев музейлары 2-11 январьда иртәнге тугыздан 13.00 сәгатькә кадәр эшлиячәк. Апас музенда «Борынгы Апас» «Безнең спортчылар», «Бөек Ватан сугышы» экспозицияләре яңа экспонатлар белән баетыла. Мәктәп балаларына, студентларга керү-ирекле.

Апасның көрәшче егете Ленар Вәлиуллин армиядән кайтты. Кече Бакырчы егете Ленар Вәлиуллин Екатеринбург шәһәрендә элемтә хәрби частенда хезмәт итте. Бик күп көрәш ярышларында җиңү яулаган егет армиядә дә сынатмады. Әти-әнисенә шундый кыю, батыр егет үстергәннәре өчен Рәхмәт хаты килде, үзе отличник билгесенә лаек булды, кече сержант дәрәҗәсе белән кайтты.

Апас көрәшчесе Радик Фәсхетдинов үз турнирын үткәрде.Радик Фәсхетдинов призларына беренче тапкыр үткәрелгән районкүләм көрәш турнирында 11 команда, 75 яшь көрәшче катнашты. Команда беренчелегендә Апас, Кызылтау һәм Кильдураз мәктәпләре вәкилләре җиңде.

Бүгенге көндә Казан Федераль университетының 4нче, 5нче курсында 25 бала белем ала. Алар уку йортының төрле факультетларында төрле юнәлеш буенча һөнәр үзләштерә. Икенче тапкыр оештырылучы очрашуда студентлар җитәкчелеккә кызыксындарган сорауларына җаваплар ишеттеләр. Иң актив студентлар Мактау грамоталары белән бүләкләнделәр. Ахырдан район башлыгы Казан Федераль университеты ректоры Илшат Гафуровка истәлекле бүләк тапшырды. Университетның символик бүләге район башлыгына да бирелде. Киләчәгебез яшьләребез кулында. Шуңа да бүгенге тормышыбызда яшьләрнең белемле, креатив, талантлы, үткен һәм тәрбияле булулары мөһим. Тиздән кулларына диплом алучы яшьләребезгә  уңышлар телибез һәм киләчәктә туган ягыбызга тугры хезмәт итәрләр дип ышанып калабыз.