Районның яшьләр эшләре һәм спорт комитеты хәбәр итүенчә,

16 гыйнварда Зур Күккүз наратлыгында чаңгы ярышлары үткәреләчәк. Теркәлү – 9.00 сәгатьтә, беренче старт – 10.00 сәгатьтә. Ярышка мәктәп командалары, оешма-предприятиеләрдән бер ир-ат, бер хатын-кыз чакырыла. Җиңүчеләргә-бүләкләр!

Кышкы каникул көннәрендә Апасның Миргасыйм мәчетендә балалар өчен лагерь эшләде. 30 бала 8 көн дәвамында вакытын файдалы да, күңелле дә үткәрде. Алар төрле уеннар аша тәртипкә, гаделлеккә өйрәнделәр.

Бүген, 13 гыйнварь көнне Апасның мәдәният йорты каршында Иске Яңа ел бәйрәменә багышланган тантана узачак. Башлану вакыты: 16.00 сәгатьтә. Барыгызны да күңелле һәм күмәк рәвештә ял итәр өчен көтеп калабыз!

Синоптиклар җиткергән мәгълүматларга караганда, алдагы тәүлекләрдә кар явудан туктамаячак. Атлантик циклон тәэсире җомгага кадәр дәвам итәчәк. Шул сәбәпле көчле булмаса да буранлы көннәр хакимлек итәчәк.

Узган тәүлектә генә дә Казанда айлык норманың 27 % күләмендә кар яуган. Норма буенча 30 сантиметр тиешле кар катламы хәзер 50 сантиметрдан артып китте.

Мәүлид ае уңаеннан һәр авыл җирлегендә Мәүлид ашлары уздырыла. Район башлыгы Рәшид Заһидуллин Заготзерно бистәсенең “Нәҗиб” мәчетеннән башлап Кече Болгаер, Зур Болгаер, Борнаш, Әлмәндәр, Зур Күккүз авылларында булып халык белән очрашты. Түбәтәйле бабайлар, абыйлар, ак яулыклы әбиләр, апалар сый-нигъмәт белән сыгылып торган табын артына бик теләп җыелдылар. Район башлыгы һәрберсенең сүзен игътибар белән тыңлады, сорауларына җавап бирде, районда барган эшләр, киләчәккә планнар белән таныштырды. Гомумән, район халкы бүгенге көн тормышыннан бик канәгать.

“Сәләт” балалар иҗаты үзәгендә балалар думасы депутатлары һәм үзәкнең активистлары түгәрәкләргә йөрүче нәниләр - Апас урта мәктәбенең башлангыч сыйныф укучылары өчен күңелле яңа ел бәйрәме оештырдылар. Бу әкияти бәйрәм балаларга бик ошады. Алар рәхәтләнеп уйнап-биеп күңел ачтылар. “Сәләт” кыш бабаеның бүләкләренә бик нык сөенделәр

Менделеевск шәһәрендә 8-10 гыйнварда узган бокс буенча республикакүләм турнирда тренер Данис Хәкимов җитәкчелегендә өч боксчы егетебез катнашты. 2001-2002 елгылар арасында Апас егете Әмир Заһидуллин икенче, 1999-2000 елгылар арасында Каратун мәктәбеннән Радик Шиәхмәтов – беренче, Җасурбәк Ахмоджанов – өченче урыннарга лаек булдылар.

Сезне чын күңелемнән һөнәри бәйрәмегез – Россия Федерациясе прокуратурасы көне белән ихлас котлыйм. Апас районы прокуратурасы хезмәткәрләре кеше хокуклары һәм иминлегенең сакланышын күзәтү, дәүләтнең законлы мәнфәгатьләрен  яклауда армый-талмый хезмәт куялар, җинаятьчелек,  җәмгыять өчен куркыныч гамәлләргә каршы көчләрен кызганмыйча көрәшәләр. Прокуратура көне – ул гаделлек өчен көрәшүчеләр  бәйрәме.  Җир йөзендә гаделлек хөкем сөрсә, тормышыбыз тагын да яктырак, имин булыр.
Апас районы прокуратурасы хезмәткәрләрен, ветераннарны, аларның гаиләләрен бәйрәмнәре белән котлап, ныклы сәламәтлек, авыр һәм җаваплы хезмәтләрендә уңышлар телим.
Рәшид Заһидуллина, Апас муниципаль районы башлыгы

Бүген, 12 январь көнне, кичке 6.00 сәгатьтә Апас Боз Сараенда театральләшкән шоу-тамаша һәм массалы шуу була.

Елның беренче көненнән үк чыккан буран нәтиҗәсендә Апаста юллар кар һәм боз белән капланды. Әйтергә кирәк, тәүлек әйләнәсе юлларны махсус техника ярдәмендә чистарту эше бик актив бара.

-Беренче кар төшү белән район аша үтүче 31,5 километрлы федераль һәм 276 километрлы авылара район юлларында 3 мобиль юл чистарту бригадасы тәүлек әйләнәсе эшли.   6 КДМ, 3 автогрейдер, 3 МТЗ тракторы юл хәрәкәте иминлеген тәэмин итә. Бозлавык булдырмау өчен махсус 1000 тонна реагентлар туплап куйдык. Яңа ел уңышлы, юлларыбыз киң һәм имин, сәфәрләребез күңелле булсын,-ди Апас районара юллар идарәсе баш инженеры Илдар Хәйбуллин.