ЯҢАЛЫКЛАР
Әхәт абый Садриевны районда белмәгән кеше юктыр, мөгаен. Дәһшәтле сугыш елларында ил күген саклап көрәшкән, тылда хезмәт куйган райондаш абый-апаларыбыз язмышын мәңгеләштерүдә чын күңелен биреп зур хезмәт куючы остаз-эзтабар ул. Актив хәрби-патриотик хезмәте өчен Әхәт абый медальгә лаек булды. Аны узган җомга киңәшмәсендә район хәрби комиссары Илшат Паймурзин тапшырды.
Әгъзам Хәмидуллин яшьләрдә хәрби-патриотик рух тәрбияләү, районыбызның тарихын өйрәнүдә зур хезмәт куя. Аның эзләнүләренең нәтиҗәсен һәркем күреп белә. Узган җомга киңәшмәсендә хәрби-патриотик эш алып баруда зур өлеш керткәне өчен Әгъзам Хәмидуллинга район хәрби комиссары Илшат Паймурзин медаль тапшырды.
14 ноябрьдә көзге чакырылыштан беренче төркем Апас егетләре армия сафларына киттеләр. Тәүгелдедән Ренат Гыймадиев, Аюкөйдергәннән Рафил Мәрдәнов, Кормаштан Илдар Сәлимов, Апастан Илназ Халиков, Бакырчыдан Риназ Шәфигуллин, Урта Балтайдан Фаил Шакиров, Апастан Равил Шәкуровка хәерле юл, исән-сау хезмәт итеп кайтуларын телибез.
Әфганстанда хәрби хәрәкәтләр тәмамлануга 25 ел тулу истәлегенә бу коточкыч хәрби хәрәкәтләрдә катнашкан райондашларыбызга медальләр тапшырылды. Таш кыялар арасында кичергән газаплар бүген дә йөрәкләрендә сыкрый, минут эчендә күз алдында өзелгән яшь гомерләр бер генә дә исләреннән чыкмый аларның.
Бүген, район хакимиятендә үткән җомга киңәшмәсендә районыбызның олы хөрмәт иясе, сугыш һәм хезмәт ветераны Зиннәт абый Хәйруллинга район башлыгы Рәшид Заһидуллин Беларусь Республикасын немец-фашист басып алучыларыннан азат итүгә 70 ел тулу уңаеннан күрсәткән батырлыгы өчен медаль һәм Беларусь Республикасы Президенты Александр Лукашенконың котлау хатын тапшырды.
7 ноябрь – Рәсәйдә Хәрби дан көне буларак үтте. Ул 1941 елда үткән хәрби парад хөрмәтенә 1995 елдан бирле билгеләп үтелә. Әлеге тарихи көн уңаеннан районда яшәүче Бөек Ватан сугышы ветераннарына кадер-хөрмәт күрсәтелде. Район башлыгы һәм җитәкчеләр аларның өйләрендә булып хәл-әхвәлләрен белештеләр, күчтәнәч пакетлар тапшырдылар. Бер генә ветеран да игътибардан читтә калмады.
Татарстан Республикасының Атказанган сәнгать эшлеклесе, Россиянең фоторәссамнар Союзы әгъзасы Фәрит Губаев Тутай авылында урнашкан Сара Садыйкова музеена үзенең төрле елларда төшерелгән фотосурәтләрен бүләк итте. Моңлы, танылган якташыбызның сурәтләре белән музей тагын да баеды.
12 ноябрьдә китапханәләрдә бердәм мәдәният дәресләре үтте. Әлеге чарага үзәк китапханә коллективы да бик теләп кушылды. Белем дөньясына быел гына аяк баскан нәниләр – Апас урта мәктәбенең 1 класс укучылары китапханәчеләр кулыннан мәдәни көндәлекләр алдылар. Балалар бер ел дәвамында музей, театр, китапханә, концерт залларында булып, көндәлекнең махсус битләренә билге-тамгалар куйдырырга тиеш була. Көндәлекне пөхтә һәм эчтәлекле итеп алып барган гаиләләр республикакүләм “Иң яхшы көндәлек”, “Иң мәдәниятле әти-әни” бәйгеләрендә катнашачак.
Кызылтау авылында республикакүләм “Авыл клублары” программасы нигезендә күпфункцияле мәдәният йорты төзеләчәк. Бүген изге дога астында аның беренче эшләре башланып та китте. Район башлыгы Рәшид Заһидуллин урында булып, фатихасын бирде, уңышлар теләде.