ЯҢАЛЫКЛАР

Роза Фатыйх кызы Адаматова үзенең олуг бәйрәмен каршылады. Буа картлар йортында тәрбияләнүче Роза апаны район башкарма комитеты җитәкчесе Равил Хисаметдинов тәбрикләп Рәсәй Президентының Котлау хатын һәм район башлыгының истәлекле бүләген тапшырды. Шулай ук юбилярның чордашлары, элеккеге хезмәттәшләре, район ветераннар советыннан Мәнфүсә Хәкимҗанова, Даймә Тимеркәева, Ринат Салахов, Расыйх Латыйповлар да Роза апага бүләкләрен тапшырып, хәл-әхвәлен белештеләр, хатирәләрен яңарттылар.

Иске Әнәле авылында гомер кичерүче Зәйнәп әби Сәйфетдинова үрнәк тормыш юлы үткән хезмәт ветераны. “40 ел сельсоветта эшләдем, кеше белән яхшы мөгамәләдә булдым, шуңа да барысы да хөрмәт итәләр мине”, – ди ул. Зәйнәп әбине олуг бәйрәме – 90 яшьлеге белән тәбрикләп район башлыгы Рәшид Заһидуллин  аңа Рәсәй Президентының Котлау хатын һәм истәлекле бүләген тапшырды.

Әгәр исән булса, бүген – 20 ноябрьдә, Татарстан Республикасының Халык шагыйре, данлы якташыбыз Шәүкәт Галиевкә 86 яшь тулыр иде. Шул уңайдан, Апас туган якны өйрәнү музее җитәкчесе Рәмис Ногманов башлангычы һәм тырышлыгы белән, аны искә алу һәм Олы Бакырчы авылында урнашкан Шәүкәт Галиев музеенда иҗаты һәм тормышын чагылдырган экспозициясен ачу тантанасы үтте. Кичәгә Татарстан Республикасының язучылар берлеге әгъзасы, Абдулла Алиш премиясе лауреаты, якташыбыз Хәбир Ибраһим, балалар шагыйрәсе Йолдыз Шәрәпова, Шәүкәт Галиевнең балалары Алсу һәм Җәмил, оныклары, туганнары килгән иде. Апас туган якны өйрәнү музеенда башланып киткән чара, Шәүкәт Галиев музеенда, аннан Олы Бакырчы мәктәбендә дәвам итте һәм бик тәэсирле булды. 

Аграр көллиятнең актлар залында районның мәшгульлек үзәге оештырган “Киләчәккә – билет” иншалар конкурсына нәтиҗә ясалды. Бәйгедә барлык 22 мәктәптән дә укучылар катнашкан. Җиңүчеләргә рәхмәт хатлары, истәлекле бүләкләр тапшырылды. 

Район мәдәният йортында Татарстан Республикасы югары уку йортлары вәкилләре менә өченче ел инде районыбызның өлкән сыйныф укучылары өчен “Ачык ишекләр” көне үткәрәләр. Бу юлы да очрашуга җиде югары уку йортының ( Казан Федераль Университеты, Казан кооперация институты, Казан аграр университеты, Казан Дәүләт энергитека университеты, Технология университеты, Н.Э. Бауман исемендәге ветеринария медицинасы академиясе) деканнары һәм укытучылары килгән иде. Аларның максаты: чыгарылыш сыйныф укучылары һәм аларның әти-әниләре белән әңгәмә кору, һөнәр сайлауда дөрес юнәлеш, киңәш бирү иде.

Казан Федераль Университеты Россия буенча иң яхшылар рәтендә. Бүгенге көндә ул дүртенче урында тора. Алар абитуриентларга булышу буенча булдырылган программалары белән дә данлыклы. Апас районы белән тыгыз элемтәдә булулары безнең өчен чиксез горурлык. Район башлыгы тәкъдиме белән Бердәм Дәүләт Имтиханнарына укучыларны хәзерләүдә дә алар ярдәм күрсәтәләр. КФУның кабул итү комиссиясенең җаваплы секретаре Сергей Ионенконы да залдагылар игътибар белән тыңладылар.

 – Һәр чыгарылыш сыйныф укучысының үз юлы, киләчәктә һәркайсының үз белгечлеге булачак. Әлеге очрашуларның уңай нәтиҗәсе булсын иде, – дип башлады үзенең чыгышын КГЭУ кафедрасының өлкән укытучысы Дмитрий Иванов.  Уку йортлары, аларның эшчәнлеге, тормышы турында хәзерләнгән видеоязмалар да кызыклы иде.

 – Апас районы авыл хуҗалыгы районы буларак, биредә агропромышленность өлкәсе белгечләренә аерым игътибар бирелә. Мәсәлән, Казандагы аграр университет ел саен техник һәм гуманитар юнәлештә белгечләр хәзерләп чыгара. Авыл хуҗалыгы терлекчелек белән тыгыз бәйләнгәнлектән табиб-ветеринарлар да күп кирәк. Аларны Н. Э. Бауман исемендәге ветеринария академиясе хәзерли. Болардан тыш Казан аграр университетының урман хуҗалыгы факультетын тәмамлаучылар да район өчен үз өлешләрен саллы кертәләр. Апас районы студентлары безнең факультетның төп терәге һәм ышанычы, – диде КГАУ деканы Людмила Тухачева.

Очрашуга килүче югары уку йортлары вәкилләренең һәркайсы булачак студентлар өчен мөмкинлекләрнең күп булуына басым ясадылар.

 – Мондый очрашуларлар безнең чыгарылыш сыйныф укучыларына уку йортлары, аларның вәкилләре белән якыннан танышу, шул ук вакытта үзегезне таныту өчен дә кирәк. Күбегезнең максаты, хыялы бардыр инде. Уку йорты турында күбрәк мәгълүматлы булу, сезгә кабат бер этәргеч булачак, – диде очрашу ахырында район башлыгы урынбасары Гөлчәчәк Мәүлетова.

Татарстан Республикасы профсоюзлары Федерациясе рәисе урынбасары Татьяна Васильева, республика хезмәтне саклау баш техник-инспекторы Ирина Андина район мәгариф, мәдәният, АПК профсоюзлары комитеты һәм җирле бүлекчәләр җитәкче-вәкилләре белән очраштылар һәм махсус семинар-укуларда катнаштылар.

– Элеккечә эш урынын, хезмәткәрләрне аттестацияләү алымы гамәлдән чыгарыла. Аны быелдан башлап хуҗалыклар, оешма-предприятиеләрдә хезмәт шартларын махсус бәяләү үткәрү (СОУТ) алыштырачак. Шул нигездә яңача эшләү эш бирүчеләргә һәм җирле профсоюзларга өстәмә бурычлар йөкли, – диделәр алар.

Киңәшмә эшендә район башлыгы урынбасары Гөлчәчәк Мәүлетова катнашты һәм чыгыш ясады.

Апас мини-футбол җыелма командасы үз тарихында беренче тапкыр зона ярышларында барлык көндәшләрен җиңеп, быел финал ярышларында катнашу хокукы яулады. 7-9 ноябрьдә Кама Тамагында үткән сайлап алу матчларында 1998-1999 елларда туган яшь апаслылар сынатмады. Команда капитаны Азбабадан Владислав Колосанов:

-Уенчылар Ринас Хәсәнов, Илназ Нигъмәтуллин, Булат Баязов, Раил Фәхретдинов, Илназ Низамов һәм Иван Колосанов финал ярышларына ныклап әзерләнә. Тренер Рөстәм абый Бикмөхәмәтов бик таләпчән безнең, командабыз 8-10 декабрьдә Мамадышта үтәчәк финал ярышларында да призлы урын яулау өчен көрәшәчәк,-ди.

Коштавылында гомер итүче Нурания апа Курамшина 90 яшьлек юбилеен билгеләп үтте. Район башлыгы Рәшид Заһидуллин юбилярны котлап Рәсәй Президентының котлау открыткасын, чәчәк бәйләме һәм истәлекле бүләген тапшырды. Нурания апа үзен шулай зурлап килгән район башлыгына, авыл җирлеге хезмәткәрләренә, күршеләренә олы рәхмәтләрен җиткерде, эшләрендә уңышлар теләде.