Апас туган якны өйрәнү музее төрле конкурсларда откан премия, грантларны инновацион технологияләргә юнәлтә. Үзәк күргәзмә залында пәйда булган сенсорлы моноблок – соңгы яңалыкларның чираттагысы. Плазмалы монитор-экранның сенсорларына җиңелчә генә кагылып, атаклы якташыбыз-галим Шамил Каратай, шагыйрь Шәүкәт Галиев, фронтовик Шәрифулла Зарипов һәм тагын 300гә якын апаслылар – Бөек Ватан сугышы ветераннары фотогалереясы белән танышырга мөмкин.

Район ЮХИДИ бүлеге җитәкчесе Румбик Гараев хәбәр итүенчә узган атнада районда 95 юл кагыйдәләрен бозган кеше тоткарланган. Икесе исә - салмыш хәлендә рульгә утыручылар.  Соңгы араларда котырган буран нәтиҗәсендә районда 8 юл халәкәте теркәлгән. Юлларда сак булуыгыз сорала!

Бөек Ватан сугышында катнашып, җиңү яулап кайткан, бүген дә балаларын, онык-оныкчыкларын шатландырып яшәүче Габделхәй бабайның олуг юбилеен зурлап, авыл клубында үткәрделәр. Авыл үзешчәннәре аның тормыш юлын бик матур итеп сәхнәләштерделәр. Рәсәй Президентының Котлау открыткасына һәм район башлыгының бүләгенә дә бик шатланды. Авыл җирлеге башлыгы да кайнар котлап бүләген тапшырды.

ООО “Свияга+” җитәкчесе Булатов Хәйдәр Хәлим улына 60 яшь тулды. Шул уңайдан Район башлыгы Рәшид Заһидуллин чираттагы җомга киңәшмәсендә Булатов Хәйдәр Хәлим улын Мактау Грамотасы белән бүләкләде, истәлекле бүләк тапшырды “Күп еллар дәвамында нәтиҗәле һәм җаваплы хезмәте өчен” диелә Мактау Грамотасында.

4 февральдә Балтай авылы мәдәният йортында дүрт җирлек – Балтай, Кызыл Тау, Тутай, Дәвеш үзешчәннәре чыгыш ясадылар. Бу чарага һәркайсы тырышып хәзерләнгән, сәхнәдә олысы-кечесе бер сулыш белән чыгыш ясап теманы ачып бирде.

5 февральдә исә Азбаба авылы мәдәният йортында үзенең концерт программаларын тәкъдим иттеләр. Шулай ук әлеге фестивальнең зональ турларын 6 февраль көнне Зур Күккүз авылы мәдәният йортында, 10 февраль көнне Биеш авылы мәдәният йортында, 12 февраль көнне Шәмбалыхчы авылы мәдәният йортында карап булачак.