Апасның “Кояшкай” балалар бакчасында “Ел тәрбиячесе – 2015” бәйгесе узды. Беренче турдан узган сигез тәрбияче – Гөлфруз Фәхретдинова, Зөлфия Шаһиева (“Кояшкай”), Райлә Гайнетдинова, Алия Нуриева (“Салават күпере”), Фирания Зыятдинова (“Гөлбакча”, Танай-Турай авылы), Гөлия Баһаутдинова (“Алтын балык”, Чурибураш), Алсу Газиева (“Әкият”, Азбаба) һәм Сөембикә Галиуллина (“Бәллүки”, Әлмәндәр) үзләренең һөнәри осталыкларын күрсәттеләр.

“Дәрестән соң мәктәп” проектында катнашып Каратун мәктәбе машина-карта отты. Әлеге машинада чын машинада кебек руль артына утырып, йөртергә өйрәнеп була. Укучылар дәресләрдән соң бик теләп машинада йөртү серләренә өйрәнергә калалар. Хәзерге вакытта балалар спорт залында машина йөртү серләренә төшенсәләр, җәй айларында урамдагы махсус юлдан да йөреп булачак.

Яз һәм гүзәллек бәйрәме белән сезне!

8 март – кешелекнең гүзәл яртысы – хатын-кызларның иң нәфис, иң асыл зат булуын искә төшерә торган бәйрәм. Безнең хатын-кызларыбыз гөлчәчәккә тиң бит ул: бөре вакытында ымсындыргыч матурлыгы, серлелеге белән үзенә җәлеп итә, ай нурында чык тамчысын таҗына кундырыр өчен ачылганда күз явын алырлык гүзәллек белән балкый. Ана дигән мәртәбәле исемгә лаек булулары, бәхетле елмаюлары, гаиләне җылытулары өчен баш иеп бәйрәм белән котлыйм. Һәрберегезгә шатлык, сәламәтлек, тыныч, имин көннәр теләп калам. Бәйрәм белән сезне, нәфис һәм гүзәл затларыбыз!

Рәшид Заһидуллин, Апас муниципаль район башлыгы

Халыкара хатын-кызлар көне уңаеннан 7 март көнне сәгать 17.00дә, район мәдәният йортында “Сәләт” йолдызлары яна” дип исемләнгән концерт була. Биредә “Сәләт” балалар иҗаты үзәгендә шөгыльләнүче укучылар үз осталыкларын күрсәтәчәк. 0+

Район пенсия фонды бүлегендә тантаналы шартларда  биш бәхетле әнигә  “Ана  капиталы” сертификаты  тапшырылды.