ЯҢАЛЫКЛАР
Район мәдәният йортында Апас шәһәр тибындагы поселогы ветераннар Советы әгъзалары Туфан Миңнуллинның “Йөрәк маем” спектаклен күрсәттеләр. Тынгысыз җанлы өлкәннәрнең осталыкларына һәркем соклануын белдерде. Бу хакта тулырак – киләсе санда.
Йомралы авыл бригадиры Илдус Галиакберов базда яшел массаны тәүлек буе таптатып торучы механизаторлар Наил Мингалиев, Җәүдәт Сөнгатуллин һәм Фирдүс Миңнуллин белән быелгы сенаж яхшы сыйфатлы булачак дип саный. Кырда «Ягуар» белән Таһир Хөсәенов ваклатып төягән яшел массаны шоферлар Ислам Камалиев, Илгизәр Кашафетдинов, Әсгать Закиров, Фәнис Яруллин ташый.
2014нче елның 15нче июнендә район җирлекләрендә үзара салым кертү буенча җирле референдумнар оешкан төстә һәм сайлаучыларның активлыгы белән үтте. Референдумнарда исемлеккә кертелгән 16 122 сайлаучының 95, 05% катнаш Барлык участокларда да референдумнар үтте һәм гамәлгә яраклы дип табылды.
Болгар җирлеген күреп, анда дога кылырга теләүчеләр елдан-ел арта. 14 июнь көнне дә Изге Болгар җыенына 120 райондашыбыз барды. Болгар җирлегендә 25 нче тапкыр үткәрелүче бу чарадан һәркайсы канәгать булып кайтты.
Кызыл Тау авылы егете Азат Җаббаров хәрби бурычын Бурятия Республикасында, автомобиль гаскәрләрендә үтәде. Ул әле яңа гына туган авылына, әти-әнисе, дуслары, якыннары янына кайтты. Азат хәрби хезмәткә аграр көллиятне тәмамлап, повар-пешекче белгечлеге һәм кулына шоферлык таныклыгы алып киткән иде. Ул уку йортында алган белемнәр, укытучыларының киңәшләре хәрби хезмәттә бик нык ярдәм итүен белдерде.
– Хәрби хезмәт дуслыкка, туган якның, әти-әнинең кадерен белергә өйрәтте. Бер ел вакыт зур тәҗрибә учагы булды, – ди әле Сабан туе көнне генә солдат хезмәтен тәмамлап, Туган авылы Югары Ындырчыга кайткан Нияз Мөхәммәтҗанов. Нияз авыл хуҗалыгы университетын Калининград өлкәсендә, артиллерия гаскәрләрендә хезмәт итте.