ЯҢАЛЫКЛАР

58 яшендә район электр элемтәсе челтәрләрен җитәкләгән Хәев Фирдүс Мәлик улы озак авырудан соң арабыздан китте. Аның якты истәлеге күңелләрдә мәңге сакланыр.

 

 

Кама Тамагы районында авыл җирлеге башлыклары катнашында зонакүләм семинар-киңәшмә узды. Анда Апас, Буа, Чүпрәле, Кайбыч, Кама Тамагы, Тәтеш районы вәкилләре катнашты.  

Бүген Апас муниципаль районы башкарма комитеты бинасында районның наркотикларга каршы көрәш комиссиясенең чираттагы утырышы булып узды. Көн тәртибендә барлык тармакларның бердәм координацияле эш алып барырга тиешлеге, Апас эчке эшләр бүлегенең законсыз наркотик матдә кулланучылар, таратучыларга каршы җинаять эшләре алып баруы, мәктәпләрдә һәм Аграр көллиятнең югары сыйныф укучылары арасында наркотик матдә куллану, кулланмауны ачыклау максатыннан үткәрелгән тестларның нәтиҗәләре белән таныштыру каралды.

14нче апрель районда язгы чәчү эшләре башланып китте. Әлеге эшне беренчеләрдән булып Әлмәндәр берләшмәсе механизаторлары башлап җибәрде. 120 гектарда “Эстер” сортлы язгы бодай чәчәргә чыктык – диде бүлекчә җитәкчесе Айдар Хәмидуллин. Район башлыгы Рәшид Заһидуллин хуҗалык җитәкчеләре, авыл җирлеге башлыклары, белгечләр, механизаторлар белән очрашты. – Язның бер көне ел туйдыра дигән борынгылар. Шуңа күрә бүгеннән старт алып, барыбыз да бердәм булып язгы чәчү эшләрен вакытында башкарып чыгыйк – дигән максат куйды район башлыгы. Шулай ук Йомралы, Горбунов берләшмәләре, аграр көллият тә җиң сызганып эшкә кереште. Хәерле сәгатьтә!

Казан шәһәрендә Туфан Миңнуллин истәлегенә багышланган укытучыларның һәм укучыларның беренче республика конференциясе узды. Анда Апас урта мәктәбенең татар теле һәм әдәбияты укытучысы Гүзәл Дәүләтшина җитәкчелегендә 5А сыйныфы укучысы Ленар Шиһабиев та катнашты. Ленар “Шигърият. “Сөй гомерне, сөй халыкны” номинациясендә өченче, “Журналистика. “Кызыл тышлы дәфтәрдән” номинациясендә икенче урынны яулады.

Республиканың хезмәт, мәшгульлек һәм социаль яклау министрлыгы оештырган “Иң яхшы социаль хезмәт күрсәтү оешмасы хезмәткәре” Бөтенроссия бәйгесенең республика этабына нәтиҗәләр ясалды. Анда 18 номинация буенча 79 кеше катнашты. Апастан “Рассвет” үзәгенең өйгә барып ярдәм күрсәтү бүлеге мөдире Светлана Салаватуллина “Хезмәттәге иҗадилыгы” номинациясендә җиңү яулады.

Татарстан Республикасы Президенты Рөстәм Миңнеханов милли бәйрәм - Сабан туен - билгеләү турындагы Указга кул куйды. Документта республикабыз районнарында бәйрәм 7-8 июньдә, Яр Чаллыда - 12сендә , Казанда - 21 июньдә узачак диелгән.

Биеш мәктәбенең 10 сыйныф укучысы Анжелла Владимирова республикакүләм “Ел укучысы – 2014” бәйгесендә җиңеп, бу көннәрдә Ульяновский өлкәсендә узган регионара бәйгедә катнашты. 29 регионнан килгән “иң-иң”нәр арасында да сынатмады ул, дипломга лаек булды.

Кама-Тамагы районында өлкәннәр арасында узган районара милли көрәш бәйгесендә безнең команда (тренер Ринат Гыйламов) беренче урынны яулады. Шимбә киңәшмәсендә район башлыгы аларга Мактау грамоталары һәм акчалата бүләк тапшырды.

12 апрельдә, 13.00 сәгатьтә, “Алтын алка” боз сараенда 2005-2006 елгы яшь хоккейчылар арасында Чулпан Салаватуллин призына ярышлар үтә. Яшь алмашка көч биреп торырга килегез!