ЯҢАЛЫКЛАР

2015 нче елның 6 апрелендагы киңәшмәдә “Без ришвәтчелеккә каршы!” темасы буенча уздырылган видеороликлар бәйгесендә җиңүче мәктәпләр бүләкләнде.

I урынны -  Кече Болгаер мәктәбе, II урынны – Борнаш мәктәбе, III урынны – Дәүләки мәктәбе алды.

Ярышлар Бөек Җиңүнең 70 еллыгына багышланды. Беренче урынны балалар спорт мәктәбе командасы яулады. Икенче урынны башкарма комитет хезмәткәрләре яулады, оченчене - мәгариф бүлеге һәм Апас муниципаль районының шәһәр тибындагы Апас бистәсе хезмәткәрләре.

Сөт  җыючылар белән район хакимиятендә узган чираттагы очрашу-киңәшмәдә сүз март аеның беренче ункөнлегендә сөт тапшыручыларга түләү мәсьәләсе турында барды. Бу ункөнлектә халыкка сөтнең һәр килограммы өчен 18,50 тиеннән 17,50 тиенгә кадәр акча түләнгән. Сөйләшүләрдән күренгәнчә, соңгы вакытта сатып алу бәясенә карап, сөткә бәя төшкән. Хәзергә халыктан җыелган сөткә 1 килограммы өчен 16 сум түләнәчәк.

Дәвеш, Олы Бакырчы, Урта Балтай авыл җирлекләрендә гомер итүче ветераннарга  тантаналы шартларда Бөек Җиңүнең 70 еллыгына багышланган медальләр тапшырылды. Һәр авыл җирлеге клубында өлкәннәр өчен коймак белән чәй эчү, концерт номерлары әзерләнде. Район башлыгы Рәшид Заһидуллин ветераннар белән очрашып сөйләште, районда барган эшләр белән таныштырды. Халыкны кызыксындырган сорауларына җавап бирде.

Апасның “Салават күпере” балалар бакчасында ЮХИДИ хезмәткәрләре “Юл саклык ярата” дигән тема астында балалар һәм әти-әниләр белән очрашу үткәрделәр. Балалар төрле уен, шигырь-җырлар аша үзләренең юл йөрү кагыйдәләрен ни дәрәҗәдә белүләрен күрсәттеләр. ЮХИДИ хезмәткәрләре аларга рәсемле китаплар тараттылар. Соңыннан әти-әниләр белән сөйләшү булды. ЮХИДИ җитәкчесе Румбик Гәрәев, балигъ булмаган балалар белән эшләү инспекторы Рания Михайлова балаларның иминлегенә кагылышлы мисаллар китереп үтемле чыгыш ясадылар.

Сыйфатлы әйбернең арзанга сатылмаганы хак башында. Ләкин акча мәсьәләсенә килеп төртелгәч, арзанрагын сайларга тырышабыз шул. Әнә шул сыйфатлы “арзан” товар ике райондаш ир-атны төп башына утырткан да инде. Алар социаль челтәрләр аша машина сатып алырга уйлыйлар. Кирәкле товарны сайлап, бәяләрен килешкәч, сатучы як, машинаны килеп алганчы, билгеле бер күләмдәге акчаны банк аша күчерү тәкъдиме ясый. Машиналы булу хыялы белән янган беркатлы ир-атлар 20-30 мең сум күләмендәге акчаны билгесез затлар кулына күчереп тә куя. Нәтиҗәдә, машина да юк, акчадан да җилләр искән, сатучылар да юкка чыккан.

Хәзер безнең хөрмәтле ветераннарыбыз район хастаханәсенең махсус палаталарында дәвалана. Биредә алар өчен “Безнең кадерле ветеран” проекты кысаларында сугыш ветераннары өчен уңайлы шартлар тудырылган палаталар булдырылды. Монда алар өчен барлык шартлар да бар. Палатага телевизор, суыткыч, чәйнек һәм башка кирәк-яраклар куелган. Заманча юыну кабинасы, бәдрәф эшли. Бер палатада Апастан  сугыш һәм хезмәт ветераны Фәрит Юнысов дәва ала. Палата ишеге янәшәсендә ветеран турында мәгълүмат язып эленгән. Фәрит абый 7 классны тәмамлагач колхозда эшли башлый. Тракторда, комбайнда тырышып хезмәт итә. Шул ук вакытта кичке мәктәптә укуын дәвам итә. 1949 елда хәрби хезмәткә алына, Төньяк Кореяда хезмәт итәргә туры килә аңа.