Район ЮХИДИ бүлеге җитәкчесе Румбик Гараев хәбәр итүенчә узган атнада районда 95 юл кагыйдәләрен бозган кеше тоткарланган. Икесе исә - салмыш хәлендә рульгә утыручылар.  Соңгы араларда котырган буран нәтиҗәсендә районда 8 юл халәкәте теркәлгән. Юлларда сак булуыгыз сорала!

Ялларда Татарстанга берникадәр салкын килә, аннары төбәктә аномаль җылы температура булачак. Бу хакта ТР Гидрометеорология һәм әйләнә-тирә мохитне күзәтү идарәсендә белдерделәр.

Узган ел Татарстанда чит илләрдән кертелгән 43 тонна азык-төлек продукциясе сыйфатсыз дип табылган. Бу хакта коллегия утырышында Кулланучылар хокукларын яклау һәм кеше иминлеге өлкәсендә күзәтчелек буенча федераль хезмәтнең ТР идарәсе җитәкчесе – республиканың баш санитар табибы Марина Патяшина белдерде.

ООО “Икмәк” коллективы район халкын кайнар икмәк, төрле кондитер әйберләр белән тәэмин итеп тора. Һәр көн саен комбинаттан дүрт автолавка продукция таратырга чыгып китә. Махсус җиһазландырылган бер автолавка кибете булмаган кечкенә авылларга бара. Халык мондый хезмәт күрсәтүдән канәгать. Югары Биябашы авылына да һәр атнаның өч көнендә, билгеләнгән сәгатьләрдә тәгәрмәчле автокибет килә.

 

Бөек Ватан сугышында катнашып, җиңү яулап кайткан, бүген дә балаларын, онык-оныкчыкларын шатландырып яшәүче Габделхәй бабайның олуг юбилеен зурлап, авыл клубында үткәрделәр. Авыл үзешчәннәре аның тормыш юлын бик матур итеп сәхнәләштерделәр. Рәсәй Президентының Котлау открыткасына һәм район башлыгының бүләгенә дә бик шатланды. Авыл җирлеге башлыгы да кайнар котлап бүләген тапшырды.

ООО “Свияга+” җитәкчесе Булатов Хәйдәр Хәлим улына 60 яшь тулды. Шул уңайдан Район башлыгы Рәшид Заһидуллин чираттагы җомга киңәшмәсендә Булатов Хәйдәр Хәлим улын Мактау Грамотасы белән бүләкләде, истәлекле бүләк тапшырды “Күп еллар дәвамында нәтиҗәле һәм җаваплы хезмәте өчен” диелә Мактау Грамотасында.

4 февральдә Балтай авылы мәдәният йортында дүрт җирлек – Балтай, Кызыл Тау, Тутай, Дәвеш үзешчәннәре чыгыш ясадылар. Бу чарага һәркайсы тырышып хәзерләнгән, сәхнәдә олысы-кечесе бер сулыш белән чыгыш ясап теманы ачып бирде.

5 февральдә исә Азбаба авылы мәдәният йортында үзенең концерт программаларын тәкъдим иттеләр. Шулай ук әлеге фестивальнең зональ турларын 6 февраль көнне Зур Күккүз авылы мәдәният йортында, 10 февраль көнне Биеш авылы мәдәният йортында, 12 февраль көнне Шәмбалыхчы авылы мәдәният йортында карап булачак.

«Россиянең чаңгы юллары-2015» Бөтенроссия массакүләм чаңгы ярышлары бәйгесе Апас муниципаль районында, Татарстан күләмендә кебек  8 февральдә үтәчәк. Чаңгы ярышы апаслылар өчен ярыш кебек кенә түгел, ә спорт һәм сәламәтлек бәйрәме булып оештырылачак.

Татарстан, Казан прокуратурасы, баш идарә аппараты, район прокурорлары закон сагында тору белән беррәттән спортта да бердәм һәм дус. 7 февральдә Апаска аларның зур спорт делегациясе килү көтелә. Җыелма хоккей командалары «Алтын алка» боз сараенда иптәшләрчә очрашу үткәрәчәк. Ярышка командаларга көч биреп торырга Татарстан прокуратурасы җитәкчеләре дә чакырулы. Татарстан прокурорларының Апас бозында бу инде икенче тапкыр очрашуы булачак,-ди район прокуроры Ришат Шакиров. Хоккей сөюче Апас тамашачысын зур спорт бәйрәменә чакырабыз!