ЯҢАЛЫКЛАР

Үз йолаларыбызны, җырыбызны, моңыбызны үзебез сакламасак, аларны кем саклар, киләчәк буыннарга нинди эз, нинди мирас калыр, узган чорларны кем хәтерләр, чал тарихыбызга кем борылып карар соң? Менә шушы уйлар белән әле 1-2 ай элек кенә олы болгаерлылар музей оештыру эшенә керешкәннәр иде. Үткәннәрне барлау, буыннар чылбырын бәйләү, тарихи-мәдәни ядкәрләрне мәңгеләштерү максаты белән башланган эш төгәлләнеп, 8 сентябрьдә авыл халкы музей ачу тантанасына җыелды. Тарихи-мәдәни мирас елында узган бу чара авылдашларны, якташларны, дусларны күрештерде, очраштырды, гапләштерде, күңелле ял иттерде.

Рәсәй Президенты тарафыннан 90 һәм аннан да өлкәнрәк яшьтәге сугыш, тыл һәм хезмәт ветераннарын юбилейлары белән котлау турындагы Указ гамәлгә кергәннән соң районыбыздагы күпме  өлкән кеше, үзләрен шулай хөрмәтләгәннәре өчен күз яшьләре аша рәхмәтләрен җиткерделәр. 10 сентябрь көнне Каратун бистәсендә яшәүче, 90 яшен тутырган Маһруй әби Галиуллинага да район башлыгы Р. Н. Заһидуллин ил башлыгының котлау открыткасын тапшырды һәм үз исеменнән дә изге теләкләрен ирештереп, иңенә ак мамык шәл салды.

4 сентябрьдә район администрациясенең актлар залында хәрби исәпкә алу һәм запастагы гражданнарны билгеләү эшен алып бару буенча эшләүче барлык оешма-учреждение һәм авыл җирлекләре белгечләре катнашында семинар-уку булды. Район хәрби комиссары Илшат Паймурзин, район башкарма комитеты җитәкчесенең мобилизация эшләре буенча ярдәмчесе Равил Гобәйдуллин чыгыш ясап хәрби исәпкә алуда җаваплылык, төгәллек кирәклегенә басым ясадылар, методик күрсәтмәләр белән таныштырдылар. Семинар-укуда район башкарма комитеты җитәкчесе Фердинат Әхмәтҗанов, район башлыгы урынбасары, комиссия рәисе Гөлчәчәк Мәүлетова  катнаштылар. Хезмәтләрен намус белән башкаручы бер төркем белгечләргә Рәхмәт хатлары тапшырылды.

Быел районда шикәр чөгендере 2700 гектарга якын мәйданда игелде. Бу басуларда бик матур уңыш үстерелде. Татарстанда иң беренчеләрдән булып август урталарында ук аның уңышын җыеп алуга керешкән “Зөя” агрофирмасы чөгендер үстерүчеләре һәм җитәкче-белгечләре фикеренчә, бу культурага 2013 елда күбрәк мәйдан бирелү отышлы булачак. Тик моның өчен чәчү әйләнешен катгый сакларга, киләсе язда кимендә 3000 гектарда чәчү планлаштырылган бу басуларда тирән көзгәчә җирне яхшылап әзерләргә кирәк булачак.

Белем бәйрәмнәрендә районыбызның 14 яше тулган 36 укучысы кулларына паспортлар ал­ды. Җаваплы – РФ гражданины булуын дәлилләүче документларны бәй­рәмнәрдә катнашкан полиция хезмәткәрләре тапшырды. Шушы көннәрдә тагын 30 укучыга шулай ук тантаналы шартларда паспортлар биреләчәк.